أنا بعتلكم أكثر من شكوى ولكن بلا رد .. أنا حسه انى تعبانه نفسيا لان كل مشكله مش بقدر احلها بسهوله وخاصة مع زوجى بحس انى مش بستحمل اى حاجه واى حاجه ممكن تعملى انهيار عصبى . حاسه انى هظلمه معايا لانى مش برضى باى حاجه غير اللى انا عايزاها بالظبط وغير كدا بكون زعلانه . وأنا عنيدة جدا مش بقتنع بسهوله بأي رأي غير اللى على مزاجى ، عصبيّة اغلب الوقت وساعات هادية اوى زيادة عن اللازم . فى شغلى بكون ساكته خالص أو لو اتكلمت بحس إني بتكلم غلط أو بقول حاجات معروفه أو مش جديده أو مفيش فيها فايده خالص . أنا لى أخ صغير ربنا يعافيه بيتعالج نفسى وبيقوله عنده انفصام فى الشخصيه ، خايفه أكون زيه ، أمي بعيدة عنى مع اننا فى بيت واحد لكن عمرها ما أخذتني فى حضنها كدا وباستنى وطبطبت عليا وقالت لى مالك واطمنى حل مشكلتك سهل ! عمرها ما عملت كدا فى حياتها بس أنا لى أخت قريبه منى بحكى لها كل حاجه . أنا عايزة انفصل واعيش مع نفسى كدا ومااظلمش انسان معى لانى انا مش بحترمه او مش مقتنعه بيه ، وهو بيستحملنى كتير بيقول عشان خاطر بنتى وعشان انا حافظة القران !! أنا فعلا حافظة القران بس حسه انى مش بستفيد منه حاجه وكمان انا بعدت عنه كتير وكمان نفسى اكون مسلمه مثاليه اصلى القيام واصلى الفجر واصوم النوافل واذكر الله كثيرا لكنّي كسوله ومش بقوم اصلى و لا حاجه ويدوبك بصلى الفروض بالعافيه مع العلم انى كنت قبل الجواز اكثر قربا من الله انا تعبانه اوى وماليش حد غيركم بعد ربنا سبحانه وتعالى