أنا بنت عزباء وعمري 30 سنه ، من حوالي سنه سجلت في موقع للزواج بهدف الزواج وتعرفت على شخص من خلاله ، وكان التواصل بيننا محدود بواسطة البيبي فقط من أجل التعارف المبدئي قبل الإقبال على الخطوبه وقد أعجبت فيه وأعجب فيني ومن فتره أمه اتصلت على الوالده عشان يتعرفون علينا وكذا ، وهو وحيد أهله ! المهم خلال هذه الفتره لاحظت أنه شخص حنون جدا ومتفهم وصبور وطويل بال لكن في نفس الوقت يعصب فجأه ويعتذر وأحسه اتكالي مرات . في بداية تعارفنا كان يدور وراي بالموقع ولقي حساب مشابه لحسابي وشك فيني وكنا راح ننهي علاقتنا لكن الحمد لله وضحت الأمور وبان له أنه ظلمني واعتذر مني وقال كان الهدف من رجوعه للموقع هو للتأكد فقط وبعدها كان كل شي تمام ، لكن لاحظت أني كل ما أسأله عن سبب تأجيله لموضوعنا يقول إنه يبغى يتعرف علي أكثر ، ولا نستعجل وكنت مؤيده له في هذي الناحيه لأني أبغى ارتبط بقناعه وتفاهم ، لكن الفتره طالت فتعذر لي بدراسته وبعدها تعذر بالوظيفه وبعد ما أكمل دراسته ورجع لأهله اعترف لي بأن والده مدمن مخدرات وأنه صاحب مشاكل وعصبي وشكاك وكان يطرده هو وأمه من البيت مرات . وبعدها اشترت أمه منزل ملك على حسابها لكن المشاكل مستمره ووالده لا يرغب في العلاج وأعمامه حاولوا مساعدته بدون فائده ، وكان قبل هذا يقول أن بينه وبين والده سوء تفاهم ولكن لم يعترف لي أو يوضح لي إلاّ من قريب وأنا بصراحه حبيته وأتمنى الارتباط فيه . لكن قبل كل هذا أريد استشارتكم كيف ممكن أساعده؟ وهل من حل لمشكلة والده؟ وكيف يمكنهم التعامل او التكيف معه؟ وهل تنصحونني بالارتباط به؟ أرجو نصحي وتوجيهي وشكرا للجميع وأعتذر على الأسلوب الكتابي !!