أولاً : أنا عندى 25 سنه ومتزوجه من 3 سنوات وعندى طفل عمره سنتين المهم أنا مش هطول كتير . أنا من البدايه اتخطبت أسبوع وسافر وقعد سنه ورجع قبل الزواج باسبوعين وتزوجنا ، وبعد ذلك قعد شهر وفى هذا الشهر كانت فيه مشاكل كتير لأنه من النوع الموسوس شويه ، وسافر بعدها وكان المفروض على اتفاق قبل الزواج إنّي أسافر معاه ! عدّى شهر واتنين وتلاته ومش بعت يخدنى وفى الوقت دى كنت حامل وعدت عليا سنه عمرى ماعشتهاش قبل كده !! أول نقطه تكونت عندى من ناحيه هذا الزوج هو عدم الثقه فى كلامه ، بعد ذلك رجع بعد ماخلفت ابنى بـ 3 شهور وقعد شهر وسافر وبعد 3 شهور سافرت له وقعدنا سنه تعتبر هذه أول سنه نقعدها متواصلين مع بعض، وعدت مشاكل كتير جدا ومن أهمها اكتشفت كلام على النت وحاجات كتير والشات على الموبيل ؛ المهم تأسّف على كل دى وخلاّني بنفسى امسح كل الاكونت بتاعته ولغى كل حاجه ومن ناحيتى ممكن اعتبر إن هذا قبل مانكون موجودين مع بعض . النقطه التانيه هى الشك رغم إنّي خلاص مش ببين له أي حاجه حتى لو مضايقه ببقى معاه عادى جدا بس يجى عليا أي وقت لوحدى بتعب جداً . بعد السنه رجعنا مصر نزل أسبوع معايا وسافر وقعد 6 شهور وسافرت 3 شهور ورجعنا تانى مع بعض وحاليا سافر من شهرين . مش عارفه هقعد سنه ولا هيبعت يخدنا كده حياتى كلها !! مشكلتى الآن أنّي تعبانه جدا نفسيا من ساعة ماسافر قلت هفكر فى نفسى ومش هسأل عليه بس عشان ابنى بتصل عليه وبعرفه إنه مسؤل عن ابن وزوجه ، فمشاكلى معاه هى من ناحيتى أنا !! أنا اللّي بحس وبتعب بس هوه اللى وصلنى لكده يعنى عدم الثقه والشك وعدم الأمان .وعدم الأمان دى مشكلتى الأكبر بمعنى إنه من بدايه زواجنا متفقين نكون مع بعض على كل شئ لكن يبقى مسافر وأنا هنا أخلّف واربّي دى مرفوضه تماما . وعن وضعى حاليا وافقت أن أقعد سنه لظروف ماليه معينه مقدراها . فى نفس الوقت بيطلب منى الحمل مره ثانية وأنا رافضة تماما لحد ما أحس بالأمان ، وحياتنا تستقر .الموضوع مهم بالنسباله لحد انه عرض الموضوع على أهلي ! والمشكله التانيه هى عدم الاهتمام بيا من كل شئ وحتى حقوقى الزوجيه تحدثت معاه كتير جدااا ومافيش أي تغير ، يمكن لو كنا قريبين من بعض كنت قدرت أنسى كل شئ .هو شايف إنه طالما موفر المسكن والأكل والشرب خلاص كده هوه تمام ومقضى كل واجباته . نفسى أنسى كل شئ وارجع تانى أحبه زى الأول وهوه أول إنسان فى حياتى ونفسى يهتم بيا ويحس بمشاعرى ونعيش مع بعض ، واخلّف تانى وتالت كمان ، وخايفه من حاجه كمان إنه ممكن يبعت لنا بيقول عشان الاقامه مش تنتهى بس خايفه يكون عشان انّي أحمل تانى وبعدين ينزلنى مصر ، أنا عن نفسى حابه أخلّف تانى بس خايفه ألاقي نفسى مسؤوله عن طفلين لوحدى !! أكيد طولت كتير على حضرتك بس أتمنى تفهم مشكلتى وتخبرنى إزّاي أعيش وأفكّر فى نفسى وأنسى كل اللّى فيّا !!!