السلام عليكم .. مشكلتي قديمه وما أدري أبدأ من فين ومنين بس بحاول احكيها لأني محتاجه مشورتكم بعد الله عزوجل .. أنا فتاه تربيت بين عشر أخوات وابن واحد عيلتنا ، كبرنا ولله الحمد الكل تزوج أولاد وبنات ما بقي غير بنت وحده وبالثانوي ، راح أسلط الضؤء علي ، لما تزوجت كنت بعمر 20 عام أول سنه جامعيه ، توفي والدي قبل سنه من زواجي وعشنا كلنا عند اخويا قبل زواج خواتي (كان عددنا 7 ومع امي وجدتي ) ولك ان تتخيل كونا جميعا بغرفه واحده ، وكنا دايم مشاكل مع زوجه اخي ، وأخي مرّة معنا ومره معها . المهم تزوجت بعد سنه من سكننا معهم وتوقعت إني راح أخرج من الجحيم للجنه ولكن انصدمت بما هوا أمرّ وأدهى ، تزوجت من رجل يبلغ من العمر 27 عاما فصل من وظيفته بعد أشهر من زواجنا ، وذلك لأن اخي طلب الوظيفه كشرط لزواج، وبدأت اعاني معه ، نص البيت ما كان فيه أثاث وكنت أعيش بشقه جنب أهله ، حاولت افتح صفحه جديده بدأت أزورهم وأروح وأجي عليهم ولكن كانو لا يحببونني . كنت لما اروح لهم كلهم يعملو روحهم نايمين وإذا رجعت بيتي يصحون وينادون اخوهم من عندي ويروح بيتهم ويسهر معهم وأنا وحدي ، حتى زوجي ما كان كويس اغلب وقته برا البيت لأن ما عنده وظيفه ، وإذا طلبت مصروف قال ما عندي ، وإذا قلت بطلع على حسابي وعازمتك يقول معندي سياره ويتعذر ، تعبت تعبت ، وكانت كل يوم المشاكل تكبر وصار يوديني بيت أهلي وبعد أسبوع يرجعني ، ومن هالحال لين تغير الوضع وصار يمد يده . أنا خلاص وقتها صار لزواجنا أربع سنين كرهته ، وكنت حاسه إنه يخونني بس ما مسكت عليه شي ، بس أنا عارفه ومتأكدة لأني زوجته وحاسه فيه ، وقتها كرهته اكثر وقررت بيني وبين نفسي أطلب الطلاق ، وفعلاً اخر مشكله كلمت اخويا وقلت له ابغئ اغير جو عندكم بالأول عصّب بس تحملت كلامه وقلت ابغئ اجي ، وجا واخدني وروحت بيتنا ووريتهم اثار الضرب وقلت لو تقطعوني قطعه قطعه ما رجعت وجلست فوق سنه يحاولو فيا ، وأنا رافضه وهوا كمان قال انه توظف بس ارجعي بس أنا خلاص مقدرت اعطيه فرصه ثانيه ، اربع سنين صبرت عليه ولا تغير الحين قرر يتغير ? قراره كان متاخر !! وفعلاً راجعنا المحاكم وكم شهر وتطلقت ، توقعت عذابي خلص ، لكن مازال مستمر ، مازلنا أنا وثنتين من خواتي عايشين مع اخويا وزوجته هما لهم البيت وعيالهم وحنا غرفه وقاطين معهم بكل المصاريف ، مرا تخاصمت مع اختي و كلمت اخويا ليا وتخاصمت معاه ،بعدين قال معك دقيقه وتطلعي من بيتي ، طنشت كلامه وبعد فتره اخذنا لنا بيت وسكنا انا واختي الصغيره والكبيره اللي تخاصمت معها تزوجت ، الان صارو كلهم الثنتين يعاروني مطلقه ، مع العلم اني توظفت وصرت معلمه ونص الراتب لهم ، وفوق ذا يعايروني ، وبالعكـس اذا فتحو موضوع طلاقي يقولو الغلط مني ، تخيل اهلي وشايفيني كيدا ، المهم انا حاليا جاتني بعثه واخويا اللي طردني يقول نروح سوا ونكمل ماجستير انا وانتي البعثه لي وهوا محرم ، اخواتي رافضين كلهم يقولو الناس وش بيقولو عنا ، مع العلم انها بعثه ، انا الان محتاره مدري وش اسوي، ودي اسافر ودي اطلع من السعوديه ، بس خايفه ادخل بمشكله اكبر ، مع العلم انو راح يسافر بزوجته وعياله يقول ما يبغى يرجع السعوديه ، ونا كمان ودي أسافر وأغير جو ومنها افتك من كلمه مطلقه ، وماتدري يمكن ارتبط هناك وينتهي عذابي ، ولو م ارتبطت برجع السعوديه بشهاده ، وبإذن الله انا قادره احافظ علئ نفسي ، وشرايك يا استاذي الفاضل ?